15.12.2025 Новости
ПІНСК. Член Саюза пісьменнікаў Беларусі, паэтэса Таццяна Яцук працягвае актыўна пашыраць геаграфію выступленняў перад аматарамі сучаснай айчыннай літаратуры: Баранавічы, Слонім, Мінск, Брэст, Гродна, Ліда… Днямі з прэзентацыяй свайго зборніка лірыкі «Прага цішыні» наша калега па пісьменніцкай арганізацыі завітала ў Пінск.
Цікавая і змястоўная сустрэча адбылася 11 снежня ў Цэнтральнай бібліятэцы горада Пінска. Член Гродзенскага абласнога аддзялення Саюза пісьменнікаў Беларусі, лаўрэат Прэміі імя А. І. Дубко, кіраўнік літаратурнага аб’яднання «Купальскія зоры», паэтэса Таццяна Яцук прадставіла настаўнікам і супрацоўнікам бібліятэчнай сістэмы горада Пінска сваю кнігу, прысвечаную 80-й гадавіне Перамогі ў Вялікай Айчыннай вайне.
Сустрэча творцы з мясцовай культурнай грамадскасцю адбылася па запрашэнні дырэктара сеткі бібліятэк горада Дзіны Анатольеўна Лагодзіч. На мерапрыемстве прысутнічаў начальнік аддзела ідэалагічнай работы і па справах моладзі Пінскага гарвыканкама Кірыл Міхайлавіч Юрчанка. Размова вялася шчырая і сур’ёзная. Удзельнікі сустрэчы абмеркавалі новы зборнік, пагаварылі пра патрыятычнае выхаванне моладзі, пра дабро і зло, пра сяброўства і каханне, наталяліся прыгажосцю трапнага, прыгожага пісьменства.
Дзве гадзіны сустрэчы праляцелі, як адно імгненне. Песні ў выкананні Віктара Мяцельскага, Галіны Бабонавай і Рэгіёны Скіпар на словы Таццяны Яцук упрыгожылі сустрэчу.
У развітальным слове Таццяна Мікалаеўна звярнулася да гаспадароў: «Дзякуй, казачны Пінск, за гасціннасць. Дзякую, шаноўная Дзіна Анатольеўна, за беражлівае захоўванне літаратурнай спадчыны. Дзякую, паважаны Кірыл Міхайлавіч, за далучэнне да літаратуры маладога пакалення і за той цудоўны падарунак, кнігу пра Пінск, якую Вы падарылі. Дзякую Вам, дарагія калегі, што прыйшлі на сустрэчу. Я думаю, што пасля гэтай творчай вечарыны ў мяне абавязкова з‘явяцца вершы, прысвечаныя вашаму прыгожаму гораду».
Сапраўды, добрае слова яднае, дапамагае зразумець важнае, значнае ў жыццёвай плыні, наталяе сэрца чуласцю і цеплынёю.
САЮЗ ПІСЬМЕННІКАЎ БЕЛАРУСІ
Гродзенскае абласное аддзяленне
Пра падзею – рэпартаж ТРК «Пінск»
Больше новостей читайте в нашем телеграм-канале Союз писателей Беларуси