20.11.2024 Новости
18 лістапада ў Мемарыяльнай зале Саюза пісьменнікаў Беларусі адбылася прэзентацыя міжнароднага зборніка паэзіі, прозы і публіцыстыкі двух Саюзаў пісьменнікаў – Беларусі і Расіі (Санкт-Пецярбургскае, Ленінградскае абласное, рэгіянальнае Пскоўскае аддзяленні і Ліпецкі Саюз пісьменнікаў «Воінская садружнасць»).
У зборніку “Победили! Перамаглі!», прысвечаным 80-годдзю Перамогі ў Вялікай Айчыннай вайне, прынялі ўдзел 37 аўтараў з Беларусі і 36 – з Расіі. Гэта значыць, што шматлікія прэзентацыі ў розных гарадах дзвюх краін яшчэ чакаюцца. Але першая ўжо прайшла ў сталіцы Беларусі – Мінску.
У Мемарыяльнай зале сабраліся госці і амаль 30 аўтараў, мінчан і іншагародніх – з Брэста, Кобрына, Клецка, Гродна і Віцебска. Кожны з іх атрымаў магчымасць сказаць сваё слова падзякі ў адрас кіраўнікоў Саюзаў пісьменнікаў дзвюх краін (А. М. Карлюкевіча і М. Ф. Іванова) за ідэю своечасовага і вельмі важнага праекта, прысвечанага такім знамянальным датам, як 80-годдзе Вялікай Перамогі і 80 -годдзе вызвалення Беларусі, Ленінградскай вобласці і Пскова ад нямецка-фашысцкіх захопнікаў, поўнага зняцця блакады Ленінграда. А таксама падзякаваць за падтрымку Н. І. Качанаву ‒ старшыню Савета Рэспублікі Нацыянальнага сходу Рэспублікі Беларусь, В.Ф. Шуглю ‒ Ганаровага Генеральнага Консула Рэспублікі Беларусь, А. Д. Бяглова і А. Ю. Драздзенку ‒ губернатараў Санкт-Пецярбурга і Ленінградскай вобласці, Г. І. Грыгор'ева ‒ старшыню Фонда памяці паэта і воіна Ігара Грыгор'ева, за дапамогу ў выданні кнігі “Победили! Перамаглі!» і рэдакцыйную раду на чале з яе старшынёй М. П. Пазняковым, складальнікам Н.В. Саветнай, рэдактарам В. С. Драбышэўскай, кіраўнікамі аддзяленняў СП Расіі – С. Ю. Порахавым, Б. А. Арловым, І. А. Смолькіным, В. А. Баюканскім і інш.
Некаторыя з расійскіх аўтараў таксама прынялі ўдзел у прэзентацыі, хаця іх не было ў Мемарыяльнай зале, але з экрана прагучалі прывітальныя словы ад кіраўнікоў аддзяленняў СП Расіі ў адрас беларускіх пісьменнікаў. Гэта яшчэ больш узмацніла адчуванне агульнасці і яднання ў адным парыве любові – да Радзімы, свайго народа і літаратурнага слова.
Беларускія пісьменнікі аднадушна адзначылі, што кніга “Победили! Перамаглі!», якая стала своеасаблівым літаратурным зрэзам падзей 1941-45 гадоў і магутнага духу савецкага народа, нясе ў сабе не толькі памяць аб выпрабаваннях, якія выпалі на долю нашых дзядоў, прадзедаў, бацькоў і маці, але і стваральную сілу адзінства, веры і дабра.
Высока ацаніла зборнік “Победили! Перамаглі!» галоўны рэдактар вядомага выдавецтва "Чатыры чвэрці" Ліліяна Фёдараўна Анцух: "Цяпер мы яшчэ не ў стане ўсвядоміць усю значнасць гэтай кнігі, але з часам яна будзе толькі ўзрастаць, станавіцца ўсё больш каштоўнай!"
Пісьменнік Славамір Даргель, выступаючы перад калегамі, выказаў меркаванне, што анталогія «Победили! Перамаглі!» павінна быць у кожнай бібліятэцы, школе, ВНУ, працоўным калектыве, і вельмі шкадаваў, што зараз няма ў яго магчымасці купіць экзэмпляраў 10-20, каб ісці з імі ў бібліятэкі.
На прэзентацыі гучалі вершы Анатоля Аўруціна, Таццяны Цвірко, Валянціны Драбышэўскай, Міхася Пазнякова, Алега Сяшко, Алены Крыклівец і іншых паэтаў, а таксама кранальныя апавяданні-ўспаміны пра сем'і родных і блізкіх, якія пацярпелі падчас Вялікай Айчыннай вайны, – Дзмітрыя Радзіончыка, Валянціны Быстрымовіч, Міхаіла Куляша, Ганны Красоўскай….
Сцэнарый і відэа-прэзентацыю падрыхтавала сааўтар і рэдактар кнігі Валянціна Драбышэўская. Яна ж і Міхась Пазнякоў былі вядучымі імпрэзы, пра якую вядомы літаратурны крытык Людміла Вараб'ёва сказала так:
– Столькі выступаў пісьменнікаў з усёй Беларусі! Такое не часта бывае. Такога роду прэзентацыя – рэдкасць! І арганізаваць яе няпроста, і правесці. Патрабуе высокай прафесійнай падрыхтоўкі і ўнутраных сіл. Але адбылася яна, дзякуючы выхаду ў свет цудоўнай анталогіі «Победили! Перамаглі!», пра якую ў сваім прывітальным слове, надрукаваным на старонках кнігі, старшыня СП Беларусі Алесь Карлюкевіч сказаў: «Прыемна, што зборнік літаратурна-мастацкіх твораў, прысвечаных юбілеям вызвалення Беларусі ад нямецка-фашысцкіх захопнікаў і вызвалення Ленінградскай вобласці, поўнага зняцця блакады, выходзіць у 2024 годзе. Наперадзе – 80-годдзе Вялікай Перамогі... Віншую ўсіх аўтараў, усіх, хто мае дачыненне да стварэння выдатнай "анталогіі Пераможцаў"! Веру, што гэты праект дапаможа нараджэнню новых творчых, стваральных ініцыятыў, прысвечаных Вялікай Перамозе».
Наталля Саветная
Фота Васіля Кулікова і Рыгора Сцяпанава
Больше новостей читайте в нашем телеграм-канале Союз писателей Беларуси