10.06.2024 Новости
У Брэсцкім абласным цэнтры маладзёжнай творчасці адбыўся Брэсцкі абласны этап рэспубліканскага творчага конкурсу юных чытальнікаў «Жывая класіка».
Юныя таленты ў сваіх выступленнях паказалі добрае веданне беларускай літаратуры, глыбокае разуменне твораў і свае артыстычныя здольнасці, а яшчэ, дзякуючы відэа-візітоўкам, мы ўбачылі прыгажосць розных куточкаў Брэстчыны з іх самабытнасцю, непаўторнасцю, прывабнасцю. Было прыемна бачыць, з якой беражлівасцю і пашанай да мастацкага слова афармляюцца літаратурныя куткі ў школах, музейныя экспазіцыі, а таксама дэманструюцца рушнікі, вышыванкі, дываны, якія старанна і рупліва стваралі прабабулі і прадзядулі.
Штогод у складзе журы – члены Брэсцкага абласнога аддзялення Саюза пісьменнікаў Беларусі. На гэты раз ад пісьменнікаў «журыла» старшыня аддзялення Таццяна Дземідовіч. Яна адзначыла, што прыемна бачыць і ўжо знаёмыя твары канкурсантаў, якія штогод удзельнічаюць у конкурсах чытальнікаў, дэманструюць прафесійны рост і тых, хто ўпершыню трапіў у фінал, здзівіўшы журы сваім майстэрствам. Для дэкламацыі юныя чытальнікі выбіралі творы класікаў, юбіляраў, а таксама пісьменнікаў-землякоў. Свае нумары прысвячалі 80-годдзю вызвалення ад нямецка-фашысцкіх захопнікаў і Году якасці. Вельмі прыемна, што юнакі па-за конкурсам чытаюць і аўтарскія вершы. І, канешне, юных паэтаў мы адзначым спецыяльнымі дыпломамі ад Брэсцкага абласнога аддзялення Саюза пісьменнікаў Беларусі.
Па інфармацыі Брэсцкага абласнога аддзялення
Саюза пісьменнікаў Беларусі
Больше новостей читайте в нашем телеграм-канале Союз писателей Беларуси